Chamada así pola corpulenta árbore que a acompaña e representa o monumento máis antigo da vila. Tamén se coñece polo nome de capela do Salvador.

A súa importancia histórica ven afianzada pola súa condición de testemuño histórico máis antigo da presenza monástica neste lugar: de finais do século IX ou principios do X.

As súas reducidas dimensións suxiren a idea dunha capela construída a título devocional. Ademais é un dos poucos templos de influencia mozárabe conservados en Galicia, é dicir, do estilo arquitectónico adoptado polos cristiáns residentes en terras conquistadas polos árabes.

Foi declarada monumento nacional en 1944 e ocupa unha posición privilexiada dentro da ruta xacobea.